“Meyxananı hazırda kimlər yaşadır, kimlər məhv edir bunu adla çəkmək olmaz. Çünki bizim millət elə əvvəldən sözbaz olub”.
Bu sözləri Faktmedia.az-a danışan tanınmış meyxanaçı Vüqar Əbdülov deyib.
O bildirib ki, istər meyxanada, istər şeirdə, istər kiminsə çıxışında həmişə söz axtarıb gülmək istəyiblər:
“Bizim meyxanaçıların da bəziləri - özləri bilir kimlərdi, ad çəkmək istəmirəm. Əslində istedad sahibləridirlər, sənətləri də var, təbləri də... Ancaq ucuz şeyin ardınca qaçıblar deyə meyxananı bu gün belə vəziyyətə salıblar. Meyxanada həvəskarlar düşüb axına. Hamısı "TikTok"da 30 saniyəlik trend axtarır, çılpaqlığa gedir, nadinc söz deyirlər ki, publika onları alqışlasın. Bu da ümumi meyxanaya zərbə vurur. Hansı ki, əslində o uşaqların çox böyük talantları var. Meyxananın özünün xarakteri elədir ki, biraz məzəli söz, satirika olmalıdır. Amma bunu da hamı bacarmır. Çoxu dramaturgiyanı, poeziyanı bilmir deyə sadəcə söz yığınından istifadə edir. Nədi-nədi trend olsun, baxılsın”.
Meyxanaçı qeyd edib ki, bəzi ədəbiyyat adamları meyxanaya sənət kimi baxmasalar da bəyənirlər:
“Yəni lağa qoymurlar. Dəfələrlə ziyalıların, ədəbiyyat adamlarının məclisində olmuşuq. Elə biri İlqar Fəhmidir ki, bu adamlar meyxananı bəyənir. Sadəcə, meyxana "lağlağı söz deyim, baxılsın" deyənlərin ucbatından öz ciddiliyini, sanbalını itirir. Mənim öz tamaşaçılarım var. Onlara hörmət edirəm və onların qabağında heç vaxt elə söz yığını deməyi özümə yaraşdırmıram. Bu gün elə poeziya da belədir. Mahnı sözlərində də elə nöqsanlar var. Bir də görürsən hansısa deputat səmimi bir söz dedi, onu həmin dəqiqə lağa qoyurlar ki, filankəs belə dedi. Bizdə çox var belə sözbazlıq. Ona görə də bunun qarşısını almaq çox çətindi. Sadəcə tamaşaçı, dinləyici, hər kəs öz sənətkarını gec-tez tapacaq”.
Havar Şəfiyeva