Qafqaz Müsəlmanları İdarəsinin sədri şeyxülislam Allahşükür Paşazadəyə Azərbaycan cəmiyyəti az qala min il idi ki, başa sala bilmirdi İran nə bizim qardaşımız deyil, nə də bizim düzəməlli qonşumuz. Cənab Paşazadə açıqlamalarında İranın Azərbaycana olan sevgisindən bəhs edirdi.

Faktmedia.az Paşazadənin ayrı-ayrı vaxtlarda İran haqqında olan açıqlamlarını təqdim edir:

“Qələbəyə çatmağımızda Türkiyə və İranın böyük zəhməti var”.

Əgər bu gün bizim qonşularımız, arxamız bərk olmasaydı, qələbəmiz, bəlkə də, olmazdı. Odur ki, Türkiyə Prezidenti Rəcəb Tayyib Ərdoğan cənablarına və Ayətullah Xomenei həzrətlərinə müsəlmanlar adından təşəkkürümü bildirirəm.
Ayətullah Xameneinin “Qarabağ torpağı İslam torpağıdır” deyərək fətva verməsi qələbənin carçısı idi və bizi qələbəyə apardı”

"İran İslam İnqilabının Ali Rəhbəri Seyid Əli Xamneyi, ayətullah Nasir Məkaim Şirazi və ayətullah Cəfər Sübhani kimi nüfuzlu din xadimləri ilə də görüşdüyünü deyən Allahşükür Paşazadə onların Azərbaycana çox müsbət münasibət bəsləyir".

"Bu gün bəzi qüvvələr müsəlman ölkələrinin yaxınlığını və mehriban münasibətlər qurmasını istəmirlər və müxtəlif təxribatlara əl atırlar. Buna görə də Azərbaycan və İran elə etməlidirlər ki, təxribatlara görə münasibətləri korlanmasın".

 “Mən bilirəm ki, hazırda onun işi çoxdur. Höccətül-İslam Həsən Ruhaninin prezident seçilməsi münasibətilə çox sevindim. Mənim onunla çoxdan dostluq əlaqələrim var. Bilirəm ki, ölkənin yeni prezidenti seçilməsi münasibətilə işləri çoxdur. Amma buna baxmayaraq, mən onu Azərbaycana dəvət edirəm. Əminəm ki o da bu dəvətdən məmnun olacaq”.

 "O, birinci müctəhiddir ki, (red: İran İslam Respublikasının tanınmış din xadimi, mərceyi-təqlid alimi, Ayətullahül-üzma Şeyx Hüseyn Nuri Həmədanini nəzərdə tutur) Azərbaycanda Qarabağ şəhidlərinin ruhuna, Qarabağ torpaqlarının azad olunması üçün dualar edib".

Allahşükür Paşazadənin İran haqqında ağız dolusu sözü-söhbətləri var. Bu haqda araşdırma edəndə yüzlərlə bu kimi fikirlərə rast gəlinir.

QMİ sədir isəyaxın bir ay ərzində isə belə açıqlamalar verib:

"Azərbaycana qonşu olan dövlət ölkəmizə qarşı ədavətli addımlar atır. Bunun nəticəsidir ki, akopyanları müqəddəs yerlərə gətirib gəzdirirlər. Mən bunu İran xalqına şamil etməzdim, bu gün orada yaşayan qardaşlarımız başa düşürlər. Onlar bu gün İran, fars rejiminin əlində əsirdirlər. İnanıram ki gələcəkdə həqiqət öz yerini tapacaq. Bu gün biz İrandan şəhid aldıq. Hansı ki, biz onları qardaş hesab edirdik. Artıq bilirik ki, İran bizim qardaşımız deyil, onlar Ermənistanın qardaşlarıdır".

"Baxmayaraq ki, İran İslam Respublikası deyilir, amma onların bizim sərhədlərdə manevr etməsi yolverilməzdir. Mən televizorda gördüm ki, hərbçilər hətta təyyarəyə oturanda bir din xadimi gəlib Qurani-Kərimlə xeyir-dua verir. Bu nəyə xeyir-dua verir? Hara göndərir? Azərbaycana? Müsəlman dövlətinin sərhədinə, ona əzələ göstərməyə göndərir. Bu, heç də müsəlmana yaraşan hərəkət deyil. Mən bunu gözləmirdim. Bəs harada idi bunların səsi? Bir gecədə Xocalıda 600-dən çox insan qətlə yetirildi. Bunu ermənilər etmədilərmi? Niyə bir dəfə bu manevri Ermənistan sərhədində aparmadınız? Biz bunu 30 il gözlədik. Torpaqlarımız işğal olundu, məscidlərimiz yandırıldı. 

"Amma mən indiyədək elə bilmişəm ki, mənə bir şey olsa, qardaşlarım gəlib məni xilas edəcəklər. Amma bu gün mənim o ümidim qırıldı. Mən kimə inanım? Mənim qardaşım məni erməniyə satdı. Milyonlarla şiənin burada ümidi qırıldı".

Son açıqlamadan isə bəlli olur ki, cənab şeyx axır ki, dostunu, düşmənini tanıyıb. Daha bilir ki, molla qardaşları Azərbaycan haqqında terror hazırlaya bilir, Azərbaycan haqqında "sionist rejimə qulluq edənlər" deyə bilir. Bəli, onun iranlı Ağasının Azərbaycanca yazdığı bu əndirəbadi fikirlər inanırıq ki, indi şeyxə bəlli olub.  

Ruzbeh Məmməd