“IT və Data sahəsinin inkişafı və gündən-günə bu inkişafın sürətlənməsi bir sıra sahələrin getdikcə aktuallığını itirməsinə gətirib çıxaracaq”.
Bu sözləri Faktmedia.az-a danışan IT mütəxəssisi Bikə Səttar deyib.
O bildirib ki, daha çox texniki sahələrə olan marağın və təlabatın artması "soft skill" tələb edən işlərə marağın azalmasına səbəb ola bilər:
“Xüsusən, bizim ölkəmizdə düzgün şəkildə edilməyən ixtisas seçimi nəticəsində bu sahəyə marağı olmayan gənclərin "sahənin aktuallığı nəzərə alınaraq"- cəlb edilməsi gələcəkdə ciddi işsizliyə səbəb ola bilər. Avropada təhsil alan və çalışan bir gənc olaraq düşünürəm ki, Avropa ilə müqayisədə ən böyük çatışmazlığımız ölkəmizdə gənclərin özünü praktiki şəkildə inkişaf etdirə biləcəyi yerlərin çox az olmasıdır. Onlar özünü nəzəri baxımdan inkişaf etdirsə də, praktiki olaraq inkişaf yeri tapa bilmirlər”.
Ekspert ikinci ən böyük problemimizi bu sahədə kifayət qədər vakansiyanın olmamasıdır görür:
“Hazırda mövcud olan vakansiya tələblərinə baxdıqda çox mənasız şəkildə şişirdilmiş, bəlkə də heç vaxt istifadə edilməyəcək tələblər qoyulur. Avropada isə hər hansı bir pozisya tələbi konkret qoyulur və əlavə göstəricilər sadəcə üstünlük sayılır”.
O vurğulayıb ki, IT sahəsinə başlamaq istəyən biri əvvəlcə bu sahənin çətinliklərini nəzərə almalıdır:
"Bu sahə çox pul gətirir" düşüncəsi ilə yola çıxanlar ya yarıyolda qalacaq, ya da tələblərə cavab verməyən bir peşə sahibinə çevriləcək. Bu sahə daha çox "Self study" tələb edən sahə olduğuna görə yüksək marağın olması ən əsas şərtlərdəndir. Əgər maraq varsa, ikinci əsas məsələ güclü bir öyrənmə xəritəsinin qurulmasıdır. Ən əsası öz dilimizdə olan mənbələrin demək olar ki olmamasını nəzərə alaraq İngilis dili biliyimizin olması bizim üçün çox böyük üstünlükdür".
Havar Şəfiyeva