Faktmedia.az müğənni Nəzrin Vəlizadə ilə olan müsahibəni təqdim edir:
- Nəzrin xanım, sənət sizin üçün nədir?
- Sənət mənim üçün incə düşünülən, zərifliklə yaradılan və çox asan qırıla bilən şüşədir. Etdiklərini həm dərindən düşünməli, həm də çox da dərinə getmədən risk edib ortaya çıxarmalısan. Gedonistlər üçün hər an, hər yer sənət əsəridir. Ən absurd ideyaların reallaşmasında belə bir gözəllik tapmaq olur. Sənət mənim üçün daim aktiv olan, tükənməyən sərvətdir.
- Məşhurlardan daha çox kimlərlə dostluq edirsiniz?
- Dostluğum yoxdur, amma yaxşı tanışlığım var. Sayı çox olduğu üçün tək-tək adlarını sadalamıram, hamısına hörmətim və heyranlığım var, həmçinin özüm də mahnılarını sevərək dinləyirəm.
- Müsahibələrin birində müəllimlikdən uzaqlaşmağı düşünmədiyini demişdiniz, bəs indi necə? Hələ də müəllimə olaraq fəaliyyət göstərirsiniz?
- Hələ də fəaliyyətdəyəm, amma yaxın zamanda daha az bu sahədə olacam, çünki özümü müəllim olaraq artıq görmürəm. Danışmaqdan, nəyisə dəfələrlə başa salmaqdan yoruluram. Təbiətim başqadır və əvvəllər özümü bu sahədə görsəm də, indi çox tükənirəm. Uşaqlarla işləmək çox böyük məsuliyyətdir və müəllimliyi yaxşı bacarsam da artıq bacarmaq istəmirəm. Tamamı ilə incəsənətə köklənməyi düşünürəm.
- Bildiyimiz qədər oxuduğunuz mahnıların sözlərini də özünüz yazırsınız. Sözlərə diqqət yetirəndə şablondan kənar, özünə məxsus bir tərz görürük. Mənə elə gəlir ki, kitab oxumayan, mütaliəyə bağlı olmayan bir adam bu sözləri qələmə ala bilməz. Kitablarla aranız necədir?
- Sevdiyim əsər çoxdur, romanlardan tutmuş detektiv və elmi kitablaradək. Daim araşdırmadayam, həyatın o "açarını" tapmağa çalışıram, üstü örtülü bütün fikirlərin dərinliyinə gedib fikrin hansı mənbəyə aid olduğunu tapmasam sakit ola bilmirəm. Və hər yeni araşdırmadan, "açardan" sonra fikirlərimi mahnılarıma düzüb insanlara qısaca çatdırmağı sevirəm. Son zamanlar daha çox tibbi, elmi kitablar oxuyuram. Zaman və fiziki bədənin gəncliyi haqqında araşdırmalarım sona çatır, yeni mahnı yazmaq vaxtıdır. Məsləhət gördüyüm kitab : Vadim Zeland "Reallığın transörfinqi"
- "Altın kelebek" mükafatı həyatınızda nə dəyişdirdi?
- "Altın kelebek" dən sonra ulduz xəstəliyinə tutulacağımı səbrsizliklə gözlədim, amma yenə alınmadı. Xasiyyətim elə formalaşıb ki, nəyə nail olsam hər zaman "daha yaxşı ola bilərdi, Nəzrin" düşünürəm. "Əlaçı sindromunda" olan insanlar məni yaxşı anlayarlar. Yəgin kraliyyət ailəsinin ən üst pilləsində olsam da bu özümdən narazı xasiyyətim dəyişməz. Mükafatdan sonra anladım ki, insan kiməsə tutunmadan, öz var-gücü ilə də istədiklərinə nail olarmış. Yaxşı ki, özümdən çox da razı deyiləm, yoxsa daha yaxşı əsərlər yaratmaq üçün motivasiyam olmazdı.
- Oxuduğunuz bir çox mahnılar tez sevilir və məşhurlaşır, amma sizi efirlərdə gec-gec görürük bu nə ilə bağlıdır?
- Bir neçə dəfə efirlərdə olmuşam, çıxışlar etmişəm, amma tətmin olmadım. Eyni suallar, eyni abu-hava. Bəlkə də nə vaxtsa səhv düşündüyümü hesab edəcəm, amma hal-hazırda fikrim budur. Efirlərdə fəaliyyət göstərmək,əslində, çox böyük stress yaradır. Hər zaman ən yaxşı halınla auditoriyaya özünü nümayiş etdirməlisən.
- Bir ara sizin ailə qurması ilə bağlı xəbərlər yayılmışdı, bu doğrudur?
- Şəxsi məlumatları əks etdirməyi sevmirəm, hər kəs kimi mənim də şəxsi və səhnə həyatım var. Bəli, biz hamımız həyat səhnəsindəyik və özəl dairəmiz o qədər əziz, o qədər dəyərli xəzinədir ki, toxunulmaz qalmasını istəyirik.
Havar Şəfiyeva