Müsahibələrdə və yaxud  hansısa işlə bağlı danışıqlar zamanı ard-arda  suallar gəlir.  Əsl adınız Havardır? Mənası nədir? Adınızı  bəyənirsiz?... Suallar müxtəlif olsa da verdiyim cavab bir olur: Bəli!
   Gəlin adında sinif yoldaşım var idi, qızın  adını eşidib, məzələnmədiyi adam qalmamışdı. Hətta qıraqdan gələn  müəllimlər belə Gəlin də ad olub qoyarlar? Rus dilində desək "Galina" inək adıdır deyib onu utandırırdı. Və o adını dəyişdi, artıq Gulya adını daşıyır. 
     Məktəb vaxtlarımda adımın  Xavər olduğunu deyəndə   sinif  yoldaşıma atdığı  atmacaların eynisindən olmasa da, müxtəlif variantlarını mənə də atırdılar. Ən xoşuma gəlməyən isə   tez-tez eşitdiyim "Xavər oğlan adıdır" cümləsi olurdu. Evdə danışanda  anam   mənə  "Adın Səməd Vurğunun həyat yoldaşının adından götürülüb"  deyərək  sakitləşdirir.
Yeri gəlmişkən anam da kitablara, ədəbiyyata  bağlı qadın olub. Hətta bir dəfə   müsabiqədə  Səməd Vurğunun "Xavərim" adlı şeirini oxuduğuna  görə ona iki kitab hədiyyə olunur. Bəlkə də anamın Xavər adına sevgisi o vaxtdan yarandı.

    Sеvgilim! Xavərim! son bahar çağı
  Uçub tökülürdü ömrümün bağı…
   Həyata küsmüşdüm sözümün sağı,
   Üzümə ilk dəfə gülən sən oldun,
  Şairin qədrini bilən sən oldun.

Ona qalibiyyət gətirən  bu şeirin adı "Xavərim" yox "Gülçöhrəm" olsaydı adım  Gülçöhrə olub gedəcəkdi.


1996-cı ilin yayı,  iyun ayının əvvəllərində Şəfiyevlər ailəsində üçüncü qız uşağı doğulur.O dövr  üçün  üçüncünün də qız doğulması xoş qarşılanan bir hal deyildi. 1 aydan çox adsız qalmağım da bundan dolayı gəlir. Özləri demiş  oğlan doğulsaydın adımı həmin gün qoyardıq.

Bir gün Səməd Vurğunun nəvəsi Nigar Vəkilova ilə müsahibəmizdə     eyni sualı Nigar xanım da verir: Əsl adın Havardır? Biz onunla atası Vaqif Səməd oğlunun  yaradıcılığı ilə bağlı danışacaydıq. Adımın Xavər Vəkilovanın  adından götürüldüyünü deyəndə şair və həyat yoldaşı haqqında xeyli söhbət elədik. Əsl adımla bağlı maraqlı xatirlərimlə yanaşı acı xatirələrim də çoxdur. Keçmiş hər zaman keçmiş olaraq qalacaq.
İnglis yazıçısı Conaton Svift demiş  əslində, bu günlə yaşayan azdır, insanların çoxu gələcəkdə yaşamağa hazırlaşır. Mən də gələcəkdə yaşamağa hazırlaşıram.

Havar Şəfiyeva